من الشيف ميمي
كيكة روعه توهبل بطعم الفروالة او التوت المشكل
بالنسبة للكيك تقدرى تستخدمى اى كيك معتمد عندك انا هنا عملت هذه الكيكة
5بيضات مفصول الصفار عن البياض + كوب سكر بودرة + كوب دقيق نشيل منه 2 ملعقة كبيرة ونستبدلهم بنشا وننخله اقل شي مرتين + فانيليا + 2 ملعقة ك ماء + ملعقة صغير بيكنق بودر + ورشة ملح +قطرات من الليمون
الطريقة : يفضل نفصل البيض وهو بارد اسهل تم نخليه بحرارة الغرفة .نخفق البياض مع شوية ليمون ولو كان عندك كريم اوف ترتار احسن وفانيليا تم نضيفله بالتدريج نص كوب السكر ونضرب حتى نتحصل على شكل كريمة تم نشيله في صحن تانى وفي نفس الخلاط نخفق صفار البيض مع نص كوب السكر تم ننخل الدقيق مع البيكنق بودر ونضيفة للخليط ونخفق بسرعه بطيئة تم ملعقتين الماء لحد ما تتجانس الخليط تم نجيب خليط بياض البيض ونحط جزء منه على خليط الصفار ونبدا نحرك من فوق لتحت مش تحريك حتى لا يخرج الهواء بس من فوق لتحت وخودى وقتك في التقليب ونضيف البياض لحد ما تخلص الكمية نحطه في القالب وفي الفرن مسخن من قبل على حرارةا180 لمدة 10 دقايق تم ننقص الحرارة 160 لحد ما تنضج ولا نفتح عليها الا بعد مرور 25 دقيقة ونشوف اذا طابت او لا حسب الفرن لما تنضج نطفي عليها الفرن ونتركها داخل شوية والباب مفتوح حتى لا تهبط تم نخرجها ونخليها تبرد ويفضل انك تعمليها قبل بيوم حتى يسهل قصها .
للتشريب عصير رمان مخلوط مع شوية مية ونحتاج الى فروالة للتزيين والحشو اذا رغبتى.
بالنسبة للصوص راح نستخدم نصه بين الطبقات ونص فوق الكيكة كطبقة نحتاج الى:
500 غ من فروالة مجمدة او فرش او ممكن توت مشكل + 3-4 ملاعق سكر حسب الرغبة + قطرات من الليمون
طبعا نطلع الكيس من الفريز ادا مجمد ونخليه يدوب ونحطه في طنجرة على النار مع السكر وملاعق من الماء والليمون ونخليه يغلي شوية بعدها نطحنه كويس يا اما بالخلاط او خلاط الشوربة ونرجعه على النار لحد ما يختر ونقسمه قسمين قسم للحشو والتانى نضيف عليه جلاتين مذوب في ماء .
الكريمة روعه وخفيفة: علبة جبن كريمى بحرارة الغرفة + كوب سكر ناعم + 2 كوب كريمة خفق + 2 كيس دريب ويب + فانيليا او نكهة فروالة الى تحبي .
نضرب الجبن والسكر حتى نتحصل على خليط كريمى تم نضيف ليها الكريمة والدريم ويب حتى نتحصل على كريمة خفيفة ومتماسكة نخليها في التلاجة لوقت العمل.
هنا انا استخدمت طاجين التشيز كيك طيبت فيه الكيكة نقسم الكيكة الى 3 اجزاء او اتنين ونجيب الحلقة متاع الطاجين المتحرك ونوضع فيها طبقة كيك تم نشربة كويس بعصير الرمان ونحط طبقة من خليط الفراولة الى عملنها او مربي ممكن ونحط جزء من الكريمة وشوية فروالة مكعبات اذا تحبي تم نكرر نفس الشي كيك ونشربة طبقة من خليط الفروالة تم كريمة تم فروالة فرش لحد اخر طبقة نشربها ونحط فوقها كريمة ونساوى السطح تم نجيب خليط الفروالة المخلوط مع الجلاتين ونصبه على الوجه وندخلها التلاجة لمدة كافية ونزينها حسب الرغبة انا هنا خليتها بسيطة بدون زينة .
بجد روعه وخفيفة جربوها والى ما ينجحش معاها الكيك الاسفنجى اعملى اى كيك معتمد عندك وتقدري تزيني الاجانب بالكريمة ولوز اذا تحبوا بس حبيت تكون بسيطة بانتظار تطبيقاتكم وانتظرونى في وصفة حلوة قريبا .
تشجيعكم ودعمكم يخلينا نعطى المزيد فلا تبخلوا علينا وشكرا.
