من
Reema Awwad شاورما الدجاج
كيلو فيليه دجاج بطلعه من الفريزر وبخليه نص ساعة في مصفاية بعدين بقطعه شرائح رفيعة جدا وهوه متلج لإنه أسهل بالتقطيع بعدين بنضفه بطحين مع شوية خل وبغسله بالمي مزبوط وبتركه يصفي منيح.
للتتبيل بضيفله ربع كوب عصير ليمون، معلقة كبيرة خل، برش حامضة، معلقة كبيرة لبن، معلقة صغيرة صلصة بندورة، شوية فلفل أبيض وقرفة وزنجبيل وهيل وقرنفل ومحلب بودرة وبهار حلو وشوية فلفل حار أحمر وبابريكا وتوم بودرة أو سنين توم عادي وملح ورشة خفيفة زيت زيتون.
بنقع الجاج من الليل بالتتبيلة وتاني يوم بحط كمية منيحة من الزيت في مقلاية كبيرة وبس يحمى منيح بضيف الجاج وبتركه بدون تحريك ورح تبلش تنزل ميته وبخليه على نار عالية بدون تحريك لحد ما تنشف المي ويبلش ينقلي بقلبه لحد ما يتحمر بالدرجة المطلوبة وبكون فارمة شوية بقدونس بضيفهم وبطفي النار مباشرة وبقلبهم شوي.
بكون محضرة خبز شراك أو مرقوق ومخلل خيار مقطع وتومية (بضرب بخلاط حبة بطاطا صغيرة مسلوقة ومقشرة مع معلقة كبيرة مايونيز ومعلقة كبيرة عصير حامض وشوية خل وملح مع سن توم)
بفرد الخبزة وبدهنها شوية تومية وبضيف الشاورما والمخلل وبلفها وعلى سخان الكهربا لحد ما تتحمص وإذا ما عندك سخان ادهني صينية شوية زيت وصفي الخبزات وادهنيهم بشوية زيت كمان وعلى شواية الفرن أو حتى الفرن من تحت بنفع وقلبيهم لحد ما يتحمصوا وصحتيييين
