من لبنى جمعة
*المكونات :
٢ او ٣ كوب عدس اخضر او مصري
٢ او ٣ ثمار بتنجان
٢ كيلو رمان حامض للعصر او ١ كوب دبس رمان
١ راس ثوم كبير
٤ فلفل اخضر صغير
ملعقه كبيره عين جراده
٢ ملعقه كبيره طحين
٢ ملعقه كبيره كمون
ملعقه صغيره ملح الليمون
ملح حسب الرغبه
*الطريقه :
يغسل العدس جيدا ويتم سلقه ١٠ دقايق ل ربع ساعه عنار متوسطه ، ما بدنا العدس يستوي تماما .
البتنجان بنكون قشرناه وقطعناه مكعبات متوسطه ، وبنضيفه للعدس النصف مسلوق ، بنتركهم ينسلقوا لحد نحس البتنجان صار اطرى ، طبعا بنضيفلهم عصير ليمونه حتى ما يتغير لون البتنجان للأسود .
بنعمل الدقه اللي هي الثوم والفلفل وعين جراده ، ممكن ما نضيف فلفل عادي ،
بندقهم سوا وبنضيفهم للبتنجان والعدس .
بنعصر الرمان او بكون معصور من قبل ، بنضيف ملعقتين طحين عليه وبنحرك كويس ، وبنضيف العصير على ما سبق ذكره من خلال المصفاة بحال وجُود اي كباتيل من الطحين ما تمر .
نحرك المكونات جميعها ولو حسينا انها جامده بنضيف شوي مي .
ممكن أضافه ملعقتين كبار او ٣ من دبس الرمان بحال العصير ما كان لاذع الحموضه .
ثم بنضيف الكمون ، طبعا الكمون بالاخر حتى ما تمرر الاكله لو ضفناه بالاول وضل عالنار يغلي .
بنضيف ملح الليمون والملح العادي حسب الذوق والرغبه .
نستمر بالتحريك عنار متوسطه وطبعا بنضل نتذوق المزيج لنصل الحموضه اللي عاوزينها كذلك الملوحه ، يعني ممكن التعديل عالملح او دبس الرمان وملح الليمون .
لما نشوف الخليط بدا يتكثف يتم ازالته عن النار .
في حال كان مرق بنزود طحين ملعقه بنذوبها بشوي مي وبنضيفهم وبنحرك
وفِي حال كان جامد كتير بنزود شوي مي .
المفروض يكون كثيف بدرجه متوسطه بحيث عندما يبرد بالصحن يكون اكله بالخبز سهل .
بنزين بحبوب الرمان ويقدم بجانبها الفلفل والفجل والبصل الاخضر او العادي .. المخللات والزيتون ، تؤكل الرمانيه دافيه او بارده ..
بالعافيه على قلوبكم جميعا
