Reema Awwad
المقادير : ٢كوب برغل أسمر ناعم، ١٥٠غم لحمة هبرة بدون دهن، بصلة متوسطة الحجم، ١/٢ م ص فلفل أسود، ١/٢ م ص بهار حلو، ١/٢ م ص كمون، ١/٢ م ص بهارات الكبة، رشة قرفة، ١/٢ م ص ملح، ١/٢ م ص مردقوش.
الطريقة: بغسل البرغل وبنقعه يادوب غمره ماء وبتركه نص ساعة لحد ما يتشرب كل الماء، بطحن البرغل مع اللحمة والبصلة بمفرمة اللحمة على الحديدة المخرمة صغير مع إضافة حوالي ٤ مكعبات ثلج أثناء الطحن للحفاظ على اللحم، وبترك حوالي معلقتين كبار برغل بدون طحن بضيفهم على الكمية اللي طحنتها عشان تعطي شوية خشونة وقرشة للكبة لما تنقلى، وبضيف البهارات كلها والملح وبجهز صحن فيه ماء بارد ببلل ايدي فيه وبعجن بس ما أكتر، بجهز الحشوه المكونة من ١/٢ كيلو لحمة مفرومة، ٢بصلة كبيرة، أقل شوي من ملعقة صغيرة فلفل أسود، م ص بهار حلو،أقل شوي من م ص كمون، ١/٢ م ص بهارات الكبة، ٢م ص سماق، صنوبر مقلي، بقلب اللحمة مع البهارات والبصل بدون زيت لحد ما تنشف ميتها، بعدين بضيف الزيت وبقلبها لحد ماتستوي مزبوط، برفعها عن النار وبضيف السماق والصنوبر المقلي وبحركم مزبوط، بترك الحشوة تبرد، بعدين باخد كرة من العجينة وببلل ايدي بماء بارد وبحفر فيها حفرة وبرققها على الداير وبضيف الحشوة وبسكرها منيح، وهيك لحد ماتخلص الكمية، للقلي بحتاج زيت عميق وحامي، وإذا الكبة متلجة بطلعها من الفريزر قبل بساعه من القلي وبفكفك الحبات عن بعض وبفردهم على فوطة مطبخ وبعد مرور الساعة بقليهم مباشرة في الزيت الحامي، وصحتين وألف هنا
