من الشيف موني
المعمول دايما بالعجوة او الفستق بس انا حبيت اعمل حاجة جديدة لأنى بحب طعم العجمية
مكونات المعمول:
3 ونصف كوب دقيق
2 كوب دقيق سميد
كوب ونصف سمنة بلدى
كوب حليب بودرة
كوب ماء دافىء
2 ملعقة صغيرة بيكنج بودر
2 ملعقة كبيرة سكر
ملعقة صغيرة محلب مطحون(المحلب بذور نبات شجرى بيعطى الحلويات والمعمول نكهة خاصة)
ملعقة صغيرة ماء زهر
مكونات العجمية:
كوب الا ربع عسل نحل
2 ملعقة كبيرة دقيق
2 ملعقة كبيرة سمنة
3 ملعقة كبيرة سمسم محمص
الطريقة:
فى اناء هنحط الدقيق الابيض ودقيق السميد مع بعض ونخلطهم ونسيح السمنة من غير ماتقدح وننزلها عليهم ونقلبهم مع بعض كويس ونسيبهم ساعتين يرتاحوا فى مكان دافى ونضيفلهم السكر والحليب البودرة والمحلب والبيكنج بودر ونقلب الخليط مع بعض ونضيفله الميه الدافية وماء الزهر ونقلبهم كويس لغاية ماتتكون عجينة ونسيب العجينة لغاية مانجهز حشوة العجمية
وفيه ناس بتعمل المعمول بخميرة بالخميرة ينفع وبالبيكنج بودر ينفع بس انا جربت الاتنين ولقيت ان اللى بالبيكنج بودر احلى
هنجهز العجمية فى كسرولة هنحط السمنة والدقيق ونقلبهم على نار هادية من غير مانحمصهم واول مايمتزجوا ننزل عليهم عسل النحل ونقلبهم كويس ونسيبهم يغلوا والنار شغالة هنحط السمسم المحمص ونقلب السمسم معاهم ونطفى النار ونسيبها تبرد وممكن نحطها فى التلاجة عشان احنا فى الصيف ونبدأ نحشى المعمول ونشكله ونرصه فى صوانى مدهونة وهنخبزه فى فرن حرارته عالية ونطلعه لما وشه يحمر ويستوى وده شكله بعد ماطلع من الفرن شكل العجمية جوة المعمول
