مقدم من Suzane Hak
الاسكالوب : صدرين دجاج بدون عظم ومقطعين لشرائح نغسلهم ونتيلهم بملح وفلفل اسود وننقعهم بالخل على الاقل ساعتين ...بعدين نجهز تلات صحون طحين وبيض مع ملح وفلفل اسود والتالت صحن بقسماط ( كعك مطحون ) ونتبل الشرحات بالطحين ثم بالبيض ثم بالبقسماط ونتركهم بالبراد شي ساعة وبعدين نسخن الزيت منيييح ونضع الشرحات دقيقتين حتى تاخد لون حلو نوطي النار ونتركهم حتى يستوو طبعا مع التقليب ...وصحتين
الصوص اللي على الاسكالوب هو بشاميل مع جبنة شيدر وفطر ...ملعقة زبدة وملعقة طحين نحمصهم شوي وبعدين نضيف كاسة حليب ونحرك بسرررعة حتى ما يتكتل الطحين ونضيف رشة ملح وفلفل اسود حتى يسمك الصوص نطفي النار ونحط شوية جبنة مبروشة وفطر مقطع
الحلو سوكسيه : السوكسيه : نذوب ملعقتين زبدة عالنار ونضيف تلات ارباع كاسة حليب مع ملعقتين سكر واربع ملاعق كاكاو وملعقة صغيرة فانيليا ونحركهم حتى يغلو نضيف نص قالب شوكولا ونتركهم حتى يبردو شوي ... نحط فوقهم البسكويت المكسر ونخلطهم ونحطهم بأي وعاء مغلف بالنايلون لسهولة القلب عند التقديم ..وبعدين عالتلاجة ٥-٦ ساعات ويفضل قبل بيوم ...انا ما كان معي وقت كتير ما جمد منيح
سلطة الفواكه: وهيي سهلة كتير بتقطعي الفواكه اللي بتحبيها ( انا حطيت اناناس ودراق وكيوي وتفاح وفريز ) بترتبيهم بالكاس وحطي فوقهم عصير فواكه وصحة وهنا كتيييير طيبة .. انا عادة بحط عالوش مكسرات مفرومة وملعقة عسل بتطلع روووعة بس هالمرة ما لحقت زين منيييح هههه