رولات المسخن
استعملت كيلو فيليه دجاج قطعته شرائح رفيعة وقلبته بشوية زيت لحد ما بلشت تنزل ميته بعدين حطيت بشاشة بهارات صحيحة (فلفل أسود حب، بهار حلو حب، هيل حب، قرنفل حب، عيدان قرفة، ورق غار، بصلة صغيرة مقطعة أرباع) وحطيت الشاشة مع الجاج وزدت عليهم المي وغطيتهم وخليهم على نار هادية ربع ساعة بعدين صفيت المرقة واستعملتها لشوربة الفريكة وخليت الجاج على جنب، بعدين فرمت ٤ بصلات كبار فرمة وسط وحطيتهم في طنجرة عالنار بدون زيت ووزعت عليهم معلقة صغيرة ملح وخليتهم على نار عالية لحد ما بلش البصل يدبل وتطلع ميته مع التقليب كل شوي لحد ما بلش البصل يلزق خففت النار للوسط وضفت رشة فلفل أسود وبهار حلو وكمون وضليت أقلب كل شوي لحد ما وصل لدرجة الاستواء اللي بدي اياها (ما دبلته عالآخر وخليت فيه قرشة خفيفة)، بعدين ضفت الجاج مع شوية زيت زيتون وقلبتهم سوا مزبوط ودقت شوي عشان أعدل الملح والبهارات، وآخر شي ضفت السماق والصنوبر المقلي وطفيت النار، وجبت خبز شراك (صاج) قصيت الرغيف الكبير أربع قطع وصرت ألف المسخن وأصفه في صينية مدهونة زيت ولما خلصت دهنت وجه الرولات كلها بالزيت وعالعين الكبيرة من الغاز من فوق حطيت الصينية وصرت ألفلف فيها من كل الجهات حتى تأكدت إنهم تحمروا بلون حلو من تحت بعدين قلبت الرولات وحمرتهم عالوجه التاني، طبعا ممكن تنعمل هادي الخطوة بالفرن بس أنا لقيتها هيك أطيب وصحتين
